Հոկտեմբերի 25-ին կայացավ Հայաստանում ագրոանտառաբուծության առաջին կոնֆերանսը․
Կոնֆերանսն անցկացվել է «Հայաստանում անտառների վերականգնում և կլիմայի փոփոխություն» (FORACCA) նախագծի շրջանակում, որը մեկնարկել է Շվեցարական համագործակցության գրասենյակի (SDC) և գործընկեր կառույցների նախաձեռնությամբ: FORACCA-ի շրջանակում Հայաստանի ազգային ագրարային համալսարանի (ՀԱԱՀ) հետազոտական թիմը իրականացնում է ագրոանտառաբուծական համակարգերի նախագծմանն ու ներդրմանն ուղղված ուսումնասիրություն:
Կոնֆերանսին մասնակցել են ՀՀ Վարչապետի գլխավոր խորհրդական Համբարձում Մաթևոսյանը, Շրջակա միջավայրի նախարարի տեղակալ Արամ Մեյմարյանը, Էկոնոմիակայի նախարարի տեղակալ Տաթևիկ Սարգսյանը, Շվեյցարիայի զարգացման և համագործակցության գործակալության տարածաշրջանային տնօրեն Ուրսուլա Լաուբլին, ՀԱԱՀ ռեկտորի պարտականությունները կատարող Հրաչյա Զաքոյանը,ներկայացուցիչներ միջազգային, հասարակական կազմակերպություներից և շահագրգիռ գերատեսչություններից։
ՀՀ Վարչապետի գլխավոր խորհրդական Համբարձում Մաթևոսյանը իր խոսքում կարևորեց անտառների տնկումը թե՛ կլիմայական, և թե՛ համայնքների տնտեսական զարգացման տեսանկյունից։
Պարոն Զաքոյանը, ողջունելով շնորհակալություն հայտնեց գործընկերներին, որոնց հետ համագործակցությունը հնարավորություն է տվել Ագրարային համալսարանին առանցքային դերակատարություն ստանձնել նախագծում, որն անհնարին կլիներ առանց համայնքների, պետական կառավարման մարմինների և միջազգային գործընկերների ներգարվմամբ։
Կոնֆերանսին հրավիրված բանախոսներն էին Ագրոանտառաբուծության միջազգային միության (IUAF) նախագահ Պատրիկ Վորմզը և Ագրոանտառաբուծության Եվրոպական դաշնության (EURAF) նախագահ Բահդան Լոյկան։
Կոնֆերանսի ընթացքում եղան իրար հաջորդող պանելային քննարկումներ, մոդերատորներն էին FORACCA նախագածի փորձագետ Հարություն Վերմիշյանը, Հունգարիայի Շոպրոնի համալսարանի գիտնական Անդրեա Վիտյիին և FORACCA նախագծի տեղական համակարգող Համազասպ Դանիլյանը։ Պանելային քննարկման խորագրերն էին.
Խթանել սոցիալական ներառականությունը․ Համայնքների կարիքները և օգուտները
Աջակցել ագրոէկոլոգիական վերափոխմանը տնտեսական կայուն զարգացման համար
Նպաստել հնարավորությունների միջավայրի ձևավորմանը․ Իրավական մարտահրավերներն ու հնարավորությունները
Հատկանշական էր այն փաստը, որ առաջին պանելային քննարկման մասնակիցների թվում էին այն համայնքների ներկայացուցիչները, որոնք ընգրկված են FORACCA նախագծի շրջանակում։
Կոնֆերանսի ավարտին ազդարարվեց Ագրոանտառաբուծության հայկական ասոցիացիայի նախաձեռնող խմբի աշխատանքների մեկնարկը։
