Մարտի 12-ին Ագրիթեք սրահում կայացավ «Հայաստանում անտառների վերականգնում և կլիմայի փոփոխություն» (FORACCA) նախագծի մեկնարկային միջոցառումը։ Շվեյցարիայի զարգացման և համագործակցության գործակալությունից ֆինանսավորվող նախագիծն իրականացնում են Հայաստանի ազգային ագրարային համալսարանը և Շվեյցարիայի անտառի, ձյան և լանդշաֆտի դաշնային ինստիտուտը (WSL)։ Նախագիծը նպատակ է հետապնդում աջակցել մեր երկրում անտառի ազգային քաղաքականության ներդրմանը՝ անտառների մշտադիտարկման բարելավման և ՀՀ միջազգային պարտավորությունների կատարման համատեքստում։
Բացման և ողջույնի խոսքով հանդես եկան ՀՀ վարչապետի գլխավոր խորհրդական Համբարձում Մաթևոսյանը, Շվեյցարիայի զարգացման և համագործակցության գործակալության տարածաշրջանային տնօրենի տեղակալ Վերներ Թութը, ՀՀ շրջակա միջավայրի նախարարի տեղակալ Արամ Մեյմարյանը, Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը, ՀԱԱՀ ռեկտորի պարտականությունները կատարող Հրաչյա Զաքոյանը և WSL-ի հետազոտական աշխատանքների գծով համադրող Մարկո Փյուցը։
Պարոն Զաքոյանը կարևոր համարեց նախագծում ներգրավված ՀԱԱՀ մասնագետների և նրանց տեղական ու միջազգային գործընկերների ակնկալվող ներդրումը։ «Ագրարային համալսարանի դերակատարությունը չի սահմանափակվելու միայն գիտահետազոտական գործունեությամբ, լայն համագործակցություն է լինելու տարբեր ՀԿ-ների, պետական մարմինների հետ և, ամենակարևորը՝ փորձելու ենք գործընթացի մեջ ներգրավել նաև ուսանողներին, որոնք, չսահմանափակվելով զուտ ուսումնական գործընթացով, կձգտեն մասնակցություն և դերակատարություն ունենալ ոլորտի «օրվա անցուդարձին»՝ դեռևս ուսանողական տարիներից փորձելով նպաստել երկրում դրական փոփոխությունների իրականացմանը», – ասաց պարոն Զաքոյանը։
«Հայաստանում անտառների վերականգնում և կլիմայի փոփոխություն» նախագծի վերաբերյալ զեկուցումներով հանդես եկան բնապահպանական կրթական ծրագրերի գծով ՀԱԱՀ ռեկտորի խորհրդական, նախագծի ՀԱԱՀ ղեկավար Էմիլ Գևորգյանը և WSL-ի հետազոտական աշխատանքների գծով համադրող Մարկո Փյուցը։
Պարոն Գևորգյանը ներկայացրեց նախագծի առաջին բաղադրիչի՝ 2023 թ․ դեկտեմբերին մեկնարկած և 2024 թ․ նոյեմբերին ավարտվելիք աշխատանքները, ներառյալ անտառվերականգնման և ագրոատառաբուծության զարգացման գործում կայուն, տնտեսապես կենսունակ եղանակներով գյուղական համայնքներին ներգրավելը և նախագծի մյուս բաղադրիչների նախապատրաստական աշխատանքներին նպաստելը։ Իր հերթին պարոն Փյուցը ներկայացրեց նախագծի՝ WSL ինստիտուտի նախապատրաստած իրականացման պլանը։
