Ագրիթեք սրահում՝ մարտի 6-ին, տեղի ունեցավ «Շեն» բարեգործական ՀԿ-ի, ՀԱԱՀ-ի եւ Գերմանիայի Ռայն-Վաալի կիրառական գիտությունների համալսարանի հետ համատեղ իրականացվող ագրոանտառաբուծության վերաբերյալ սեմինարաշարի հերթական սեմինարը՝ առկա-հեռավար հիբրիդային ձևաչափով:
ՀԱԱՀ-ում ծրագրի համակարգող, Անտառագիտության և ագրոէկոլոգիայի ամբիոնի վարիչ Մարինե Մարկոսյանը, ողջունելով հանդիպման մասնակիցներին, ներկայացրեց սեմինարի թեման՝ «Ագրոանտառաբուծական համակարգերի պլանավորման մոտեցումները»՝ նշելով, որ այն «Ագրոանտառաբուծության խթանում՝ հանուն փոքրամասշտաբ գյուղատնտեսության սոցիալական և բնապահպանական առավելությունների ավելացման» ծրագրի շրջանակում կազմակերպված վեցերորդ սեմինարն է:
Սեմինարի ընթացքում քննարկվեցին ագրոանտառաբուծական համակարգերի ստեղծման և կառավարման տարբեր ասպեկտներ․ ի թիվս այլ հարցերի, անդրադարձ կատարվեց ջրային հաշվեկշռի, հողի պահպանության և էրոզիայի կանխման թեմաներին, քանի որ դրանք ագրոանտառային զանգվածների ստեղծման հիմնական նպատակներից են: Ուստի, ինչպես նշեց բանախոսը, ելնելով վերոնշյալ նպատակներից, ագրոանտառաբուծական համակարգերի նախագծերը կարող են համապատասխանեցվել առանձին ֆերմերների ակնկալիքներին, ինչպես նաեւ առկա հնարավորություններին:
Դասախոսության ավարտից հետո ծավալվեց ակտիվ քննարկում, սեմինարի մասնակիցները՝ ՀԱԱՀ դասախոսներ, ուսանողներ, պետական և հասարակական կառույցների ներկայացուցիչներ, բնապահպաններ, Շենավանի բնակիչներ և ոլորտի այլ շահակիցներ, իրենց հետաքրքրող հարցերն ուղղեցին բանախոսին և սեմինարի կազմակերպիչներին:
