Հոկտեմբերի 10-ին Հայաստանի ազգային ագրարային համալսարանի և «Շեն» բարեգործական հասարակական կազմակերպության կողմից իրականացվող ագրոանտառաբուծության վերաբերյալ սեմինարաշարի հերթական թեման էր «Դինամիկ ագրոանտառաբուծությունը որպես Բոլիվիայի Անդերի բարձր և չորային շրջաններում հողի բերրիությունը և ջրի պահպանման կարողությունը բարելավելու միջոց»։
Դասընթացավարը Մոլեսենեյտա հետազոտական ֆերմայի հիմնադիր դոկտոր Նոեմի Շտադլեր-Կալիչն էր, որն Ագրիթեքում հավաքված գործընկերներին և ագրոանտառաբուծությամբ հետաքրքրված այլ շահագրգիռ մասնակիցներին հանգամանորեն ներկայացրեց սեմինարի թեման։ Դինամիկ ագրոանտառաբուծությունը բնութագրվում է տեսակների բարձր բազմազանությամբ և բուսականության բարձր խտությամբ: Այն նպաստում է սիներգիաներին արմատային համակարգի մակարդակում, հան-գեցնում է վնասակար և օգտակար միջատների միջև հավասարակշռությանն ու նպաստում է մեծ քանակությամբ կենսազանգվածի առաջացմանը՝ սիմբիոզի և արմատների ձևավորմամբ, ինչը բերում է հողում հումուսի ավելացմանը։ Իսկ հումուսը կատարում է սնուցող և ջուր կուտակող գործառույթ։
Սեմինարին մասնակցում էին ինչպես Ագրարային համալսարանի դասախոսներ և ուսանողներ, այնպես էլ ոլորտի այլ շահակիցներ՝ բնապահպաններ, պետական և հասարակական կառույցների ներկայացուցիչներ, որոնք դասախոսության ավարտից հետո իրենց հուզող հարցերն ուղղեցին բանախոսին և սեմինարի կազմակերպիչներին:
